上年10月25號及12月10號推介中國星（326），現價較呢兩日造價分別大升1.4倍及55%。中國星飛天，永恒（764）潛在增值超級肥仔，揸中國星之餘，又買永恒。
持有中國星大增值
據永恒上個月新鮮熱辣，按月披露所揸中國星CB及可能兌換、出售情況，永恒持有中國星面值2.2億CB，可兌換中國星20.45億股，每股兌換價0.11元。以中國星現價0.196元計，永恒潛在增值1.76億銀。
又據港交所（388）SDI紀錄，永恒另外hold住中國星6.82億股，所講應該係中國星紅利CB，每股兌換價只係1仙。永恒呢手貨，幾乎免本，利潤啖啖肉，又另一個增值1.34億銀。
永恒齋計呢兩板貨，總增值達到3.1億銀，或每股0.68元，係永恒現價（0.96元）71%！
永恒連中國星增值，每股NAV貼近5蚊，大幅折讓81%，PB得0.19倍，吸引到痹。
永恒上年6月底，淨現金達4億銀，加埋7月時實收出售觀塘物業5.3億銀，淨現金應該上到9.3億銀，或每股2蚊。若連埋上邊所有應佔中國星權益變現，永恒多增另一個5.3億銀，每股淨現金將高達3.17元，係現價3.3倍！
永恒上周發盈利倒退警告，但只涉物業增值減少，係非營運性因素。就算係咁，永恒PE頂多上到8、9倍。
再講，集團超級現金牛拓展財仔業務，單以10厘息計數，每年都淨袋近億銀利錢，而嚟自中國星增值啖啖肉，亦未反映，冇問題。
永恒PB係咁意收窄到0.5倍，可見2.5元，要升160%。
錢雋
細價股專家
本欄逢周二、五刊出