商業電台炒李慧玲，在意料之中，無甚驚奇，但奇怪之處就係點解炒得咁粗暴，唔俾佢返電台，直情命令職員同佢執拾，打包，送上客貨車，到將軍澳交返俾前僱員。資深中環人S在公司見得炒魷多，亦曾親自監督HR，實Q人員為被炒員工執拾寫字枱，但有一個大前提，就係必須在當事人（被炒員工）在場睇住，否則，話：「試過有一位女士話實Q執嘢時冇通知佢，佢自己返到屋企unpack（開箱），發覺櫃桶內有私人物品不見了。」被炒女職員之言，係真係假，已經唔緊要，反正無對證，雙方最後談判結果，係公司賠償幾千元，當好來好去，了咗件事，費事上警局。
故此中環人S話：「商台咁做法，有風險㗎，有經驗嘅HR經理，一定會勸揸弗人唔好咁樣，應該叫李慧玲返去睇住執嘢先至啱。」
唔走都走咗咯，李慧玲只在乎追究梁振英施壓，新聞自由等大大問題，搶佔道德高地，讓商台捱打。其實商台唔交代，突然解僱嘅理由，似係掃李慧玲出門，在公關上當然處於下風。商台簡簡單單講：「君子相分，不出惡言」，幾玄噃。一位熟悉商台人士猜測呢句偈語會係出於俞琤手筆，好似十年前炒鄭經翰講「棄兵曳甲」（編按：原作「棄甲曳兵」，出自孟子）咁。我哋讀中國歷史，知道「戰國策．燕策二」有「樂毅報燕王書」，其文載「古文觀止」，文末段有云：「臣聞古之君子，交絕不出惡聲，忠臣之去也，不潔其名」，「不潔其名」之意即不毀其君而自潔，用今日語言，忠臣離君而去，唔會唱衰君主（今之大老闆）嚟為自己攞名聲，以此觀之，商台與李慧玲，都違反咗樂毅原則。但商台講「君子相分，不出惡言」，是否同樣意思？左丁山諗唔到，肥仔K自告奮勇，上網查吓「相分」點解。孔子說周公，有「天人相分」之說，佛經《金剛經》有「相無相分」等詞語。簡單解釋相分係：使互相增進「契分、情誼」，當然與分手或絕交大有分別。佛教學說有「見分、相分、自證分、證自證分」更與商台嘅「君子相分，不出惡言」嘅意思，完全唔同。睇嚟商台粗暴炒人拋書包，令我哋凡夫俗子更加糊塗不明其意。