教育局局長吳得掂被揭上任半年要求調走常秘「車厘子」謝凌潔貞，加上上任兩個月就換走新聞秘書，變成「官見官怕鬼見愁」。車厘子有「小羅范」之稱，即有羅范椒芬咁上下強勢，又有教育碩士學歷，狼英最初心儀佢做局長，無奈佢推咗，先至輪到吳得掂執二攤，所以官場一直唔睇好呢對貌合神離怨侶。
解畫答非所問
大家不妨先回顧下，羅范做過教育局前身教統局常秘，02年中開始同局長李國章拍住辣手推教改。李局長有名你叫「亞瑟王」，即唔嘢小，羅范又係超強，反而兩人拍得住四年幾，仲喺干預教院學術自由風波中互撐，談咗一場「教育戀愛」，感情深厚。羅范06年10月被調走，兩人擁抱告別，難捨難離。
吳得掂同車厘子就唔同喇，既然惡劣關係被踢爆，咁吳得掂點算？佢噚日出席廣東社團聯會團拜後出嚟解畫，先講所有公務員調動都要按既定程序，講咗一大輪，咁究竟有冇要求踢走車厘子？吳得掂讚佢好專業，每日長時間工作，好有經驗，「所以佢同我喺工作上係很好拍檔，大家互相提點」，總之答非所問，唔知佢哋幾時會「分道揚鑣」呢？