台中市長胡志強嘅囡囡胡婷婷同Soler成員Julio農曆年前驚爆離婚，有傳Julio脾氣臭兼多女埋身，令胡婷婷忍痛斬情絲，當時胡父指囡囡心碎，到外國沉澱心情，日前胡婷婷喺網上透露行蹤，原來佢去咗泰國療情傷，仲做瑜伽舒緩情緒，佢留言自嘲：「天真信永遠。」
備受千夫所指嘅Julio，自公告離婚後一直未露面，經理人Eva指Julio向佢交代事件時，表現好hurt又眼濕濕，仲透露Julio正放年假，跟弟弟Dino一家返意大利探親人，但據知其實Julio去咗加拿大，今日返港，為即將開拍馮小剛嘅新戲做準備，稍後要返內地拍攝。
以為同樣心碎嘅Julio，原來喺大年初二拍短片上網，同細佬齊齊向大家拜年：「恭喜發財，我哋係Soler，我哋𠵱家喺加拿大過年，祝大家馬年進步，身體健康，最重要係龍馬精神。」着紅衫襯黑外套嘅Julio精神奕奕，唔見一點情傷，似乎極速復原。另一條係日前上載嘅短片，Julio陪姪仔Damiano喺草地踢波，父愛氾濫，睇嚟佢喺屋企人嘅陪伴下，已撫平分手傷痛。
「已經開始哀悼」
胡婷婷前日喺facebook透露結束行程返台北：「我很感謝這個地方所給我的一切。在我最無力無助的時候，接住了我，陪着我學習一點一滴的拼湊回我的內心。我想，我已經開始在哀悼。一段關係的結束是某一種形式的死亡。」
撰文：馮仁昭