彭浩翔執導完電影《撒嬌的女人》後，打算今年不再做導演，只會主力做演員和放假休息，自從去年底與太陽娛樂簽了演員合約後，該公司7月將投資一部由他與郭子健做男主角的搞笑片《悲慘世界》，導演由其老友杜汶澤擔任，原來阿澤也是首次當導演。
死剩男被強姦
潮流真的變了，不少演員都去當導演，如周星馳、趙薇和徐崢等，且轉型成功，原本當導演的彭浩翔和郭子健愛上演戲，昨日彭浩翔在電話說：「其實今次逼出嚟嘅，早排同郭子健傾起開戲嘅事都話要等演員，我話𠵱家啲演員咁忙又咁貴，不如我哋自己做主角，唔好煩啦！反正𠵱家啲演員轉晒做導演，咁我哋都要轉啦！」
《悲》片講述某城市因受病毒感染，全城男人死剩彭浩翔和郭子健兩人，飢渴的全城女士搶着強姦這兩位地球男，彭浩翔笑說：「我準備叫千嬅、周迅、楊冪同梁詠琪客串強姦我哋，另外開場要死一班靚仔，呢班靚仔我想叫余文樂、黃曉明、古天樂幫手，但𠵱家導演阿澤同我哋有分歧，佢話主力強姦我哋嘅女人最好係魯芬，咁至配合片名，但我哋想Twins囉。」
日前彭浩翔已找古仔談過這部戲，阿彭說：「佢話我哋黐線，唔信我哋真係去做演員，其實拍廣告、演戲、做商演都係我夢想，如果有得去雲頂登台我都唔介意㗎。」問強姦戲尺度大膽嗎？他笑說：「我要先問老婆畀我拍幾多先。」
此外，身兼監製、編劇和導演的阿澤昨說：「我會揀魯芬去強姦佢，但因為我哋同邵音音合作過，所以音音姐好有機會擊敗魯芬。」他表示群星拱照彭浩翔，力捧他首當男主角，可要求他健身減肥出鏡？阿澤說：「佢陰質（騭）多潛質，佢冇天份練大隻，惟有我鏡頭遷就。」阿澤指該片預計斥資一千萬港元，暑假期間開拍，聖誕檔上映。
採訪：鍾國仁
