近日有雜誌大爆本地講波佬身價，令我們一班同事在facebook、WhatsApp被朋友轟炸數天：「原來你咁有米！？」「仲唔請食飯？」同事們皆相視而（苦）笑。報道說星級人馬1萬蚊講一場，月入可達10幾萬，好過做副局長；經驗較淺的都有7萬8萬。我不能透露任何人的人工，但可以說的，是報道中身價，沒有一個準確。想知做講波佬有冇醫生律師咁好搵，睇吓我哋返工揸Benz定坐巴士；住淺水灣定九龍灣；同日頭使唔使做多份工如足球教練、老師、繙譯等，便一清二楚。
5位數講一場波的傳說早在行內聽聞，那是90年代行內講波佬十隻手指數得晒的時期，而傳聞亦只有一人可達此「高峯」（相信大家該估到）。後來ESPN在新加坡成立總部，招兵買馬，有前輩說當年被邀往新加坡講歐聯，周二晚機去，周四早機返，這樣一程連機票酒店，也有5位數收入。那是講波佬最風光的時代。
當收費電視出現並壟斷直播賽事，一日直播球賽場數，堪比免費台全年直播量。以前非世界盃年，免費台一年直播不足廿場，就算5位數一場波，全年人工不過廿萬；如以今天工作量計，電視台一年為一位講波佬開支便逾150萬，顯然是不可能。而且，電視台亦會不斷引入較廉價的新血（如小弟），去「分擔」前輩的工作量。雖然「風光不再」，但可寓工作於娛樂，講波仍是優差。
方柏翹