李慧玲事件，有一種講法叫拿出證據來，每當發生呢類事件，建制派、政府官員總會振振有詞，要求被害者拿出證據。李慧玲在城市論壇答得啱：「我就係證據。」呢種打擊傳媒人手法，唔同刑事罪行，亦冇可能用刑事舉證嘅要求，係咪要當場捉到梁振英致電俞琤，並偷偷錄到雙方對話，先至叫做有證據？儍的嗎？
行兇者必然用盡方法掩飾
政治干預乃一件事先張揚命案，行兇者點會唔用各種方法去掩飾，判上判，由表面唔相關人士出手，事後仲要清理現場，引導輿論走向，甚至在案發現場扮圍觀途人，一邊收風，一邊誤導辦案探員。
若果從環境證據睇，梁振英當然係頭號嫌疑犯，因為佢唔妥李慧玲在問責班子人所共知，而且唐英年早在2012年已指出，當年梁振英建議用縮短商台發牌至三年，來整治修理唔聽話之主持人。
仲有自佢上場後已不斷發生同類型事件。DBC清大班場、信報炒游清源同陳伯添、明報空降馬拉老總，調走劉進圖，「不遲不早，偏偏在佢民望最低時發生，令人們不禁要問，背後是怎樣一項陰謀？」策劃、執行又係乜嘢人？
第二個證據是現場扮旁觀者策略，李慧玲在記協開記者會正式回應時，梁之spin doctor新任新聞統籌專員馮煒光走去fb群組搭訕，表示李都冇料爆，單單呢個動作，已經十分可疑，傳媒怎可能輕輕放過！如果有睇CSI NY，都知道要請馮專員問話。
其實由早上set agenda時段調走李那一刻，就已為解僱作部署、利用一個令李慧玲極之反感兼唔舒服之環境，逼佢發火發難兼發癲，從而失去公眾支持，順理成章將佢公開「處決」，配合梁執行處決令之商台管理層，其用心之毒，相信連梁振英也估唔到。
假如陳志雲真的受寃，梁振英真的無辜，兩人均被李慧玲及其幕後勢力誣告，還他們公道只有一個方法，由立法會進行獨立調查。當日路祥安干預港大民調、羅范干預教院，政府還會委任大法官作獨立調查，但今日梁振英自己係疑犯，佢當然唔會委任獨立調查委員會。動用特權法係第一步，一旦被否決，亦要成立專責委員會去調查，內會否決，就掛在資訊科技委員會下邊。
一於寃鬼纏身，誓不罷休！
添馬男