舊年開始，阿里巴巴、騰訊（700）與國產手機名牌小米成為財經界最人氣嘅公司，唔少傳統企業都話要跟佢哋偷師或者合作，就連內地地產龍頭萬科都組織高層接連拜訪，繼之前參觀完阿里與騰訊後，上星期再去小米總部進行考察，又令市場產生無限遐想。
小米講明唔只做手機
萬科總裁郁亮上星期帶住80名高層組成嘅考察團去小米總部，考察完畢，郁亮即刻開玩笑話要跟小米合作開發「萬米」，之後又有人喺微博上傳出佢哋要籌建「小米公寓」。
冇計喇，𠵱家任何公司跟阿里、騰訊、小米拉上關係都畀人無限想像空間，騰訊之前入股華南城（1668）、上星期跟A股王府井合作就刺激兩隻股股價造好。小米唔甘於只做手機，早前又話進軍移動支付市場，似乎又係商機無限，市場都期待呢類企業點樣跟傳統企業擦出火花。