升咗做富豪酒店（078）副主席嘅太子女羅寶文，除咗要打理酒店王國之外，呢排仲要為自創嘅卡通《寶狄與好友》飛來飛去，忙到連情人節都要喺北京過。而佢呢項心血結晶，今日下午6點就會喺央視首播，呢套卡通仲搵嚟歌星陳慧琳唱主題曲。
羅寶文出名係愛犬之人，鍾意到要為佢哋製卡通，仲要搞咗幾年。呢套卡通片，主角全部都係羅寶文嘅愛犬，佢親自度咗108集劇本，總共有495個場景、251個角色，成個團隊總共有300幾人，投資額過千萬元。除咗央視，遲吓仲會放上內地各大視頻平台，香港嘅小朋友想睇，可能就要等到暑假。
盼做到喜羊羊咁成功
《寶狄與好友》除咗動漫之外，仲有電腦遊戲同手機遊戲，羅寶文遲啲計劃出埋玩具、精品，而佢早前透露，好希望將呢個品牌上市㖭，因為佢覺得內地對教育嘅需求唔細，可惜卡通品牌只得一、兩個，所以好想將呢個品牌做到《喜羊羊》咁成功。