港股重上22000點後，連續兩日高開低收，相信令唔少好友大失所望，道指上周五抽升逾百點，恒指今日肯定再一次高開，能否收高仲係未知之數。不過，全國兩會3月初舉行，中資股按理都唔會做得咁差，樂觀啲睇，大市示人以弱，係希望好友死心，兼且引淡倉落叠都唔定。
大市亂chok，玩指數嘅戰友肯定頭痕。咁個股又如何呢？喺呢個情況下，即市短炒可睇實大成交破位嘅股份，始終如此波動市下，依然有人肯真金白銀落注，理應唔會咁短癮，上周五嘅例子就包括華南城（1668）及遠東環球（830），兩者一破阻力區（4元及1.82元），就如入無人之境，即市追入都有幾個巴仙斬獲，收市前跌穿買入價就止蝕離場，目標清晰。當然，如果破位股有當炒概念嘅話，更加值得坐過夜，今日推介嘅金風科技（2208），就係其中一員。
金風科技主要喺內地從事風力發電機組研發、製造及銷售，兼提供全面風電服務，喺阿爺大力提倡美麗中國概念下，值得秤先。概念贏晒，業績亦交到功課，金風已發盈喜，預期去年全年盈利最多勁升兩倍，以此基數計，現價市盈率唔夠8倍，股價絕對有上升空間。金風上周五收報8.53元，升6.4%，短線先睇月初高位9.6元，都已經有逾一成利潤。
唐牛