大埔林村噚日筵開500席盆菜宴慶新春，場面都幾墟冚。教育局局長吳克儉係座上客，平時講多錯多嘅佢，致辭時都不忘搞吓爛gag，話自己係龍年出世，而今年又係馬年，所以一定要祝大家龍馬精神咁話。嘩！佢啲成語算唔算係有進步呢？到咗鳴炮儀式，吳得掂即刻變「唔襟嚇」，拉彩炮時仲驚到要瞇埋雙眼，七情上面鬼咁肉緊。好明顯係俾彩炮嚇驚。
講番場盆菜宴，有蝦、有雞同鮑魚，蠔豉仲特別多，「好事」、「好事」夠好意頭。局長自爆自己係盆菜迷，覺得係中國特色菜，可以大棚人一齊食，三五知己又得，不時訂個盆菜同家人齊齊起筷好開心。佢話最鍾意食豬肉同魷魚，唔肥唔食，八方真係替佢擔心，佢就話啲汁唔濃，菜又多，所以冇有怕喎。
林村係客家人做主場，雖然吳克儉媽媽係潮州人，爸爸係廣東人，但佢話都聽得明少少客家話，「聽得到兩句，但講就講唔到喇」。中聯辦副主任林武都有出席盆菜宴，幾乎食足全場先走，臨走時見到八方同成班行家等佢扑咪，佢就無厘頭上前派利是。被問到有關政改諮詢，佢話一定要喺《基本法》同全國人大決定嘅框架下推出，又話公民提名係違背呢個框架，「係行不通」。