美國前財長薩默斯成日俾人話口出狂言，最近似乎收斂咗，仲好有風度，雖然之前同耶倫爭做聯儲局主席輸咗，但耶倫上任後，薩默斯冇諸多批評，反而力撐耶倫維持刺激經濟嘅政策方向大致上正確。
開口護航 冇諸多批評
薩默斯為耶倫護航，話外人好難判斷儲局嘅行動，𠵱家內需不足同增長緩慢，仍然係經濟最大嘅威脅，相較兩年前，他𠵱家對經濟睇法已經冇咁樂觀；又話如果政府增加開支或者減稅去刺激增長，而唔係依賴貨幣政策或其他融資工具，美國前景更好，但咁就唔係儲局能力範圍。
至於近期熱話債務上限，佢話應該廢除立法批准提升債限嘅程序，因討論冇建設性。佢話自己嘅小朋友讀大專，都有討論學費由佢哋自己交定佢負責，但從來都冇討論過應唔應該找卡數，因唔找卡數分分鐘影響屋企嘅信貸評級，即係叫國會都唔好攞美國嘅信貸評級嚟「較飛」。