公關大姐大新年開工之後，再擇吉日吃開年飯，明益左丁山，叫埋一齊與佢啲靚女僱員到證券商會吃大餐，要咗一間房，自不然要訂一圍菜，呢間商會嘅飯菜勝在件頭夠，碟碟咁大，十二人一圍嘅菜式，十四個人食唔晒，何況我地只有十個人，其中得一位係男性！於是食到飽一飽，打包又打包，甜品係合桃蓮子露，每人吃一小碗後還有五六碗可以打包。此日最讚賞一味炸子雞，皮脆肉滑，冇雪味，秘書V咬一啖就話係新鮮雞，唔係冰鮮雞。係噃，即刻找侍應一問，佢話：「我地在新年前已買定好多活雞，劏好後放入大雪櫃，依家再拎出嚟做炸子雞，與外間買市面冰鮮雞做炸子雞，係唔同㗎。」
眾人一致讚賞，咸認為證券商會此雞值回票價，唔怪得一年到晚呢個只限會員幫襯嘅餐廳客似雲來，生意好到極，左丁山唔係會員，要跟住大姐大先至可以入內。吃過炸子雞、炒飯及合桃蓮子露，飽到唔識行，返到公司，見到一份電郵，一位讀者Terance來郵罵左丁山講年初一晚上吃風雞，自相矛盾，因為風雞放在雪櫃個幾禮拜，與冰鮮雞有何分別呀，Terance話：「其實中國人真係要放下食東西的態度啦，好像多麼貴嘅和牛都是雪在雪櫃賣的啦，活雞這麼不衛生的售賣方式一早要被取締的了！」
左丁山要講得精細一點，隻風雞不是在雪櫃冰格，而是在雪櫃上層，放個幾禮拜旨在令隻雞更加乾身而非變雪條，在超市嘅冰鮮雞就唔知雪咗幾耐先至賣到我地手上呢。在家吃牛肉豬肉，平時為咗節省時間，一個星期去大埔街市一次，一次過買齊，所以平時周日都係吃冰格存貨。但到咗星期六就考究啲咯，當晚所吃之牛肉豬肉、活雞、鮮魚皆是中午時分在大埔街市肉枱、魚檔、雞檔買入之新鮮貨，吃得多就知食材嘅分別。平時要返工，放工在家吃晚飯係咁意啦，但到咗星期六就全部吃新鮮食材，其樂無窮，知道跟隨西方人日日吃雪肉，實在係忽視中國文化。Terance唔信可以試吓，如果食唔出食材之分別，咁就係人之不同，各如其面焉。