球星慶祝入球動作花樣百出，有球員更會將其自創嘅慶祝手勢申請專利巴之閉。入波後得意忘形嘅例子多的是，「古」有巴神掀衫問Why always me，「今」有尼馬（小圖）跳「艷舞」被指對對手不敬。
今仗復出嘅尼馬「士哥」後太high，同隊友丹尼爾齊齊fing頭扭pat跳舞慶祝，賽後被斥唔尊重對手，不過巴塞主帥馬天奴維護愛將，指尼馬只係受場外新聞同情傷困擾多時，入球後先會興奮過頭。原來尼馬當時係模仿緊巴西一首性感MV嘅舞步（上圖），MV內有多位辣妹演出，看來剛剛與女友分手嘅尼馬真係dry得好緊要。
球員上得場自然都希望成為場上嘅焦點，除咗騷出眾球技之外，有時連慶祝入球動作都要花啲心思搶吓鏡，博球迷留下深刻印象。咁樣做至少10年後被人提起，噏唔出個名，都可以博人記得曾經有位「男人老狗」入波後做心型動作扮cute啦。
以女性角度看球星新聞，唔用眉筆用原子筆寫低球壇百態！
文：呂晨