渣打馬拉松係全港盛事，吸引唔少名人落場「集郵」，佢哋日理萬機，當然唔係跑全馬或半馬啦，只係參加專為40位政商界名人而設嘅兩公里「領袖盃」，呢啲嘢，係身份象徵嚟㗎。即將退休嘅港大校長徐立之係其中一位參賽者，佢坦白承認自己嘅表現麻麻哋，梗係啦，因為佢大部份時間係步行唔係跑，仲唔怕同你講：「主席叫我見到鏡頭就跑！」
咁坦白，記者即刻問呀徐校長，咁咪即係造假？徐立之笑住否認，話都係「幫補吓啫」，雖然自己都真係「行多過跑」。睇怕為咗徐校長，渣馬應該改名做「揸流攤馬拉松」又或者「渣斗馬拉松」啦。徐校長就繼續風騷，話第日唔再做校長，會挑戰10公里賽事，佢10公里最佳時間係1小時27分鐘。
高永文公園練跑五次
相反，同樣參加領袖盃嘅食物及衞生局局長高永文就有備而戰。佢話自己去九龍仔公園練習過四、五次，每次跑2.2公里，較比賽嘅2公里仲要多，相當認真，連行會成員陳智思都話，高醫生跑得快過佢好多，唔知佢係咪講緊特首跑馬仔呢？
高醫生同香港大學校務委員會梁智鴻、醫院管理局梁智仁教授同香港防癌會的朱楊珀瑜，共同贏得由參賽者互相投票選出嘅「最佳馬拉松精神獎」。雖然徐立之係名人賽跑得「嚤」，但係都獲頒「最鼎力支持大獎」，表揚佢自2006年起率領港大馬拉松隊參加渣馬。過去9年共有9,300名港大成員參與賽事，徐校長都真係冇功都有勞。
李八方
mailto:[email protected]
