本欄上周開快車，一個星期推介三隻股份。2月14日有情人渡過浪漫一夜之後，便完成了半季的賽程，暫且為緊湊的上周來一個快檢討。
利記（637）：上周本欄以「純投機，博見底反彈」的理由推介此股，在臉書上最先推介，當時股價為1.09元，翌日捱一日後，最多升到1.15元，出業績後股價冇反應，情人節下午喺臉書以1.05元叫人撤退，蝕3.7%，短炒計，雖在臉書曾建議高位食一半，但仍是捉到鹿唔識脫角，理得佢業績，食咗先講嘛！
中信銀行（998）：今年首個跟報告炒的推介，主要因為自覺睇錯舊中國股，轉軚博繼續反彈，咁啱信行升得急，推介日開市價4元，最高見4.19元，情人節收報4.1元，暫升2.5%，未叫落車。《蘋果》即時新聞見到，有文件指中信集團董事長常振明表示，信行2013年盈利逾390億元人民幣。信行2012年全年賺超過310億元人民幣，意味全年盈利增長達25.8%。
亞視高危 料有手尾跟
港視（1137）：上周五見報貼港視，開市報2.87元，承本欄粉絲支持，即日最多彈14.5%見3.24元，收報3.11元，暫贏8.4%。免費電視公聽會未開，但肯定有手尾跟，亞視個牌好危，因為睇電視師奶係CY嘅票倉，亞視hea成咁都續牌，一定得失支持者。另外，王維基可以同中移動（941）子公司做刁，你當佢流？消息股惟有睇緊啲，贒實本欄個臉書專頁啦！
高明
http://www.facebook.com/AppleKoming