各位老細我叫阿金，大波金，在我30年的職業生涯，有幸見盡奇人奇事，認識到很多有情有義的新知舊雨，真是好想同大家分享一下我遇上的雞人雞事，如果大家唔夠喉，下期待續……
跟古天樂認識已經是上一個世紀90年代頭，當時我出席一個大型活動，大明星當然有人招待，當時古仔都未入行，在一間娛樂公司做一個助理，有個靚仔走來問我需要甚麼？我心諗咁靚仔做助理有點浪費！我問他為甚麼你不去做明星？他當然用他那個招牌酒渦怕怕醜醜笑住問：「你想飲乜嘢？」古生到現在都不停對人說：「我幫吳君如買奶茶㗎！」
古仔少近女色
真的跟古天樂熟絡一點就算是拍《家有囍事2009》，只有埋位大家同一個鏡頭內我才見到他。他閃了去邊？平常他會在家化好妝、弄好頭髮、穿好戲服才走入拍攝現場，拍完一個鏡頭他又閃返入車，甚少跟人打牙骹，亦都好少接近女色，你不和他聊天他亦從來不主動！人家叫他古仔我就喜歡叫他古生，有次有人跟我說他很不喜歡人叫他古生，跟住第二日叫他古生嗰條友俾人打到入廠——錄影廠！哈哈哈哈！
豪氣抽獎助興
《金雞sss》的江門古天樂其實真是好古天樂，古生對細嘅特別好！每次去甚麼春茗、慶功都會自己攞錢出嚟大抽獎，前兩日《金雞sss》慶功他一到現場就問：「今晚你有冇搞抽獎？」我話：「煞科宴搞過啦！」他說：「抽啦抽啦大家開心呀！」我說：「哦哦哦咁抽啦！不過走剩兩枱人喎！」他忘記了他差不多10點先到！結果古生在他的大袋內抽了個透明密實袋，袋內有一叠大面額嘅銀紙！結果抽獎過程當然很精采！抽中嘅人士包括他助手，他司機、我助手、我化妝、我公司同事……你話佢對細嘅幾咁好！講番古生裝錢嗰個膠袋先，我們平常出來吹水食飯當然通常是他埋單，他有個黑色銀包已經用了很多年！又厚又多卡咁啦，但為了他自己方便裝銀紙抽獎，他自己特別找廠家訂製了多個非常耐用大號的廚房家居必備嘅「密實袋」，一用就用了四年！江門古天樂有句對白：「我今日巧滾動我可以攞幾皮出嚟唱番首歌，誓要去入江門……」
雞人雞事1：男神子華
新年某天與我的男神黃子華在朋友家玩樸克牌，男神坐在我旁邊，我已經整晚開心到有意無意不停地在給他看我手中的底牌！從他的第一個棟篤笑我已經開始臣服於他，他那種自信帶點傷感、瘦中帶點病態是最迷人！《金雞sss》中有個我和他擁抱的鏡頭，當時簡直是「金雞難過男神關，孖你一齊去沙灘。」
其實我同陳可辛第一次約會就是看子華的棟篤笑！我們看完又開開心心講吓傾吓，所以子華是我倆的吉祥物。
雞人雞事2：𡃁仔中基
鄭中雞（基）最喜歡打邊爐、食漢堡飽、食公仔麵、飲威士忌，未見過佢放啲健康食物入口，但身材就似件𡃁仔！常對住我講的口頭襌：「家姐你睇吓我幾撐你！」平常他喜歡用個「西」字多過用個「9」字！《金雞sss》中他有句對白：「我只會對住我喜歡的人先會做番自己！」其實基仔做番自己一點都不搞笑甚至乎幾靚仔和型仔。
雞人雞事3：爆笑子丹
我好鍾意甄子丹叫我Sandra，特別發音得準確，他叫我君如又叫得特別親切。跟他拍戲，去到現場他第一句問我：「君如這場戲行嗎？夠不夠好笑！」我特別覺得受尊重！如果子丹不能來客串《金雞sss》這場葉問crossover宗師的戲是不會有的！當子丹準備向着我的面出他的「日字衝拳」時，他很認真地說：「君如小心點，我這陣子沒練，不然我還會打貼一點你的臉，我怕我會打死你！」我當時怕都沒怕過！還笑到肚子痛。
子丹有個習慣，拍第一個鏡頭，臨roll機之前，他就想拉！他有時還要去找一間靚酒店屙，但每次屙完返嚟就一定會拍到好嘢！今次佢冇屙因為我緊張到快過佢屙咗先！
雞人雞事4：示愛秋生
2002年《金雞》首映請了我非常重視的戲劇大師黃秋生去看首映，看完後真的希望得到大師的一句評語！Err……其實我的演出如何？大師回答：「你真是一個聰明的白癡！」吓？跟見大寶法王高人一等，聽不懂也不敢再問下去！這句話真是念念不忘必有迴響！《金雞2》找了大師來當個嫖客偷師，在《金雞sss》大師仍然是一位嫖客！首映完畢亦希望得到大師的一句點評：「你仲係一個聰明的白癡，你估咁易做呀？Love u」嘩嘩嘩！14年後我得到了Love U，大師你永遠都不要變心！
雞人雞事5：儍強阿澤
杜汶澤未見其人先聽其聲，可能學武之人中氣夠，中國人話齋聲大就命長。佢好good mouth，見人矮又話人腿長，見到晶哥又問點解瘦咗咁多！佢成日話：「薛凱琪，做乜你咁靚㗎？」、「毛姐，嘩！你幾歲？邊有咁靚嘅女人㗎？」本人目擊下，每個人都受，還要封番封利是回禮，我曾經亦以為自己是受益人，現在他一開口講甚麼，我都會話：「知喇得喇！」我們曾經出生入死，出面風風雨雨從來沒有動搖過我們的友情！我發過他很多脾氣，他受過我很多氣，但他還給過我一張空頭支票，說有需要時開多少錢都可以。
他口硬心軟！在《金雞sss》中是一個好喜愛嫖妓的整形科醫生，常要求所有的妓女都有對organic胸。好久沒見過一個文靜的阿澤。其實我一直很想知道，究竟他是一個爛仔，還是一個書生，我唔肯定，我只能夠話，佢喺我心目中仍然係一個儍強！
【君無戲言】
撰文：吳君如
