無懼天寒地凍又大風，今日人聲鼎沸馬拉松。如無意外，以下事件將會陸續發生……
•跑友們出門口時好凍，返屋企時就好暖；
•個個行上起步點時都有啲後悔，但個個跑完都一副死而無憾嘅冧樣；
•有好多人要去完廁所先起步，亦有唔少人起咗步先要去廁所；
•有人一大班friend齊起跑，但跑跑吓得番一個人；
•有人一個人起跑，但跑跑吓撞番好多熟朋友；
•起跑時少咗啲噓無謂人嘅聲，多咗啲鼓勵自己嘅歡呼聲：跑得快，不如跑得晒；
•有啲人不忘舉機自拍，有啲人跑到忘我俾人偷拍；
•有啲人見到啦啦隊打氣，會跑快一陣，跟住又慢番，有啲啦啦隊見到跑友，就會high一陣，跟住又靜番；
•有啲人見人爬頭，佢又想爬人頭，有啲人見到人上岸唔跑，佢又想唔跑；
•有啲熱心人喺場邊送暖遞蕉，有啲冷血人喺場邊媽叉叫囂，因為佢過唔到馬路；
•有啲人留前鬥後，有啲人放頭狂走，但中途就嘔；
•有啲着得型過你，但跑得慢過你，有啲明顯肥過你，但跑得快過你；
•有啲人鍾意戴耳筒聽歌聲，跟住音樂個beat嚟跑，有啲人鍾意聽自己心聲，跟住自己心跳個beat嚟跑；
•有啲人跑馬拉松，為咗喺終點求婚，有啲人跑馬拉松，為咗喺中途瘦身；
•有啲人練咗都未必跑得快，但肯定冇一個人可以唔練都跑得快；
•J2台有幾部攝影機沿途做直播，但fb有成千上萬嘅攝影師邊跑邊做live；
•fb post得越多相嘅，肯定完成嘅時間越慢；
•唔跑嘅有好多藉口，去咗跑嘅無需任何理由；
•輪椅選手萬一上唔到斜路，唔到工作人員趕佢去出口，旁邊跑友一定已經伸出援手；
•有好多人下年想再跑，亦有人下年唔再跑，但決定出外跑。
有幾個勁人贏咗，但冇一個跑友係輸嘅！
KEYMAN