上周六上演英足盃16強賽事，打頭陣嘅係「黑貓」新特蘭主場對「聖人」修咸頓，前者以1:0小勝晉級。黑貓始終以英超護級為今季最大目標，所以領隊普耶喺呢場波作出咗唔少調動，相比起一星期前輸畀侯城場聯賽，正選陣容有9個變動，得番奧沙同波連尼繼續上陣。雙方喺上半場互無紀錄，易邊後4分鐘，格力加特拿（上圖右三）一次靚絕遠射破網，令主隊以1:0贏波晉級。
普耶賽前都話喺英足盃晉唔晉到級其實唔重要，最頭痕係要重賽，怕會影響到佢哋喺英超護級。可能連球迷都認同，容納到近五萬人嘅光明球場，呢場波只得唔夠萬七人入座。𠵱家普耶求仁得仁，唔知去到8強佢又會唔會排強陣爭盃呢？