今年係馬年，報上有不少應景文章講馬，從歷史講起，睇落幾有趣，可增廣見聞，為通識帶來新營養。丁望先生在「信報」講到內地出版錢穆之「中國經濟史」，可能就係葉龍先生之「錢穆講中國經濟史」（由葉龍先生之上課筆記輯錄而成，部分筆記曾由錢先生增刪潤飾）嘅內地版本。講馬點解講到錢穆？因為有一位劉將軍盛讚錢先生眼光獨到，在書中講及馬與中國之戰事及興衰：錢先生話在塞外及華北大平原以至西域，打仗無馬不行，騎兵軟弱，必敗無疑。宋朝時代，盛產良馬之兩個地區分別係今天之內外蒙古，長城以外，以及新疆。呢兩個地區分別由遼及西夏控制，宋朝漢人管轄地區缺馬，後來被蒙古鐵騎入侵，有其遠因。
騎兵所騎之馬，當然唔係今天沙田跑馬之純種馬，純種馬只重速度不求耐力，根本上唔到戰場。施老闆永青亦趁熱鬧講馬，指純種馬並非純種，配種方法違天道（am730，二月七日）：「生物演進是全方位的，這種人為的單一方向的演進方式，對『純種馬』的平衡發展不一定有利。這可能會令到『純種馬』除了用作競爭與表演外，再沒有其他能力。單方面的卓越，只會令『純種馬』失去自然界生存的能力，一旦出現環境突變，牠們就會無法適應。『純種馬』遲早會被英國人這種自作聰明的育種方式害死。」
馬主N等幾位馬迷，睇完唔知施老闆為何有此憂慮，英國人自阿拉伯引進之種馬，經三百餘年配種，根本就只有一種用途，一種能力，就係競賽吖嘛！呢啲馬邊度會有野外適應生存能力嘅呢，配種之「立法原意」根本就係賽跑，別無其他用途，「純種馬」就是因為咁而繼續存在下去，直至全世界一齊禁絕賽馬為止（目前大概只有共產國家禁賽馬），施老闆不必為純種馬沒有其他能力憂心噃，馬有好多種，整個族群（Horse Family）屬於Equidae，常見之馬有兩大類，第一類係輕身馬（Light Horses），競賽馬（今之純種馬）便屬此類，另有身短強背舉步高嘅輕身馬用於拖馬車；第二類係重身馬（Heavy Horses），比較矮，腿短，上身強壯，軍事上用於打仗，在民間用於耕田，香港好少見到，但在其他地區就有大把。