近年上位上得好快嘅「拍烏蠅」，早排喺好多個音樂頒獎禮入面都大豐收，雖然拍烏蠅攞獎時都有多謝吓另一半，不過關仁知道佢其實好花心，直情花過花心蘿蔔，所以坊間以前傳佢啲緋聞，絕對唔係空穴來風。
媾女慘食檸檬
關仁聽聞有幾個索女，咁啱佢哋都係拍烏蠅嘅target，話說有一次試過呢幾個女人喺同一日一齊做job，咁啱大家嘅電話又響，一睇之下，佢哋同時都收到拍烏蠅傳嚟愛的訊息，原來佢想漁翁撒網約晒成班女仔，再睇吓邊個上釣，拍烏蠅勢估唔到呢幾個女仔咁啱一齊做嘢，結果拍烏蠅嗰晚就真係拍烏蠅，冇一個女仔肯同佢應約，自此之後，拍烏蠅喺媾女界都臭名遠播。
撰文：關仁