昨日情人節，唔少藝人都會同佢哋嘅另一半慶祝下，又或者會收到另一半嘅禮物，好似Cammi BB(謝芷蕙)咁，佢同0依家呢個據知係內地富二代嘅新歡應該係第一次過情人節，當然要搏命咁晒命啦。
昨午Cammi BB先係晒咗張攬住勞蘇嘅相，同大家講聲情人節快樂，佢仲好有心思咁，喺instagram同微博分別晒唔同嘅相。過咗一陣，佢喺微博就唔見咗人，剩係貼相喺instagram。
之後Cammi再發功，晒咗一張咬住…蠟燭嘅相，話：「Waiting.... Dinner .」等緊食喎；又過咗一陣，Cammi就貼咗張佢今晚食乜餸嘅相，就係腳...蟹腳。其實Cammi BB對腳都好長，唔使再以形補形喇。但係呢一堆腳，係邊個煮嘅呢？原來係Cammi嘅有錢男朋友煮，因為佢下一張相，就係喺廚房依偎住佢男友0架喇!
之前都有講過，Cammi BB嘅男友疑似內地富二代，睇下佢個廚房，仲大過啲「劏房」；再留意下廚房上有啲咩，係心形牛扒，但都有可能唔係牛扒、豬扒都得，但唔好理咩扒，咁有心思，真係加晒分。
但唔好似為咁就完，Cammi BB嘅晒功絕對唔簡單。又過多一陣，佢再發功，今次就到晒禮物喇。唔只一份啊，有花有朱古力仲有卡地亞嘅包裝，但就唔知有咩喺盒入面，不過可能等多陣Cammi BB就會晒埋出嚟。
睇真啲禮物，有一個盒冇牌子，但個形狀就好似係戒指盒喎，唔通內地富二代求埋婚？不過可能性都低，因為Cammi BB如果真係畀內地富二代求婚，佢仲唔即刻九秒九晒出嚟咩？