「蘋果」及其他報紙話台灣收緊香港人移民台灣嘅成本，投資移民最低限額係一千萬元新台幣，比現在增加一倍，合港紙約二百五十六萬元，令不少人移民台灣「夢碎」咁講。
係唔係咁多人想移民台灣呀？左丁山有懷疑啫，自己就從未聽過有朋友移民台灣，葉一堅除外，亦不聞朋友下一代要移民台灣，去台灣旅行遊玩就話有好多人啫！移民？去退休呀？台灣經濟唔係咁好，搵工不易，人工低過香港，三十零歲之精壯人士移民到台灣，想建立家室，養兒活女甚有挑戰性，已經有米嘅又唔同講法，印印腳，唔駛做，去台灣南部享受較純樸生活，可以玩吓浪漫。陶淵明之能夠採菊東籬下，皆因佢當時已經有個錢，錢雖不多，但已令佢可以不為五斗米折腰。今天香港人有幾多個肯學陶淵明？即或有之，數目稀少咯！
以此問一位香港周末人（即星期一到星期五在台北工作，逢星期五下午回港，星期一早上去台北返工嘅人），佢樂此不疲近二十年，早已熟悉兩邊情況，左丁山去台北就得過佢招待，派司機送左丁山在台北周圍行。佢話俾左丁山聽：「我啲老友在香港請工人，萬七蚊一個月無人應徵，我在台北請同類工人，月薪三萬台幣（約七千七百港元）就可以搵到，在台南更加容易，香港人去到台灣，幾難忍受低薪之苦。我在台北都唔多見到有港人移民風，怕係香港報紙作大箒。」
以往香港人喜歡移民加拿大，但現在此路難通，南華早報話加拿大香港領事館之「移民快撈」堆如山積，移民資金有幾十億元咁多，幾乎全部來自強國人，令領事館窮於應付，卒之搞到加拿大政府宣佈暫停移民申請。移民之風在1985至1994年間十年最盛，左丁山不少老友就係在呢段時間各奔前程，「孔雀東南飛」，中間不幸有不少夫妻成為分飛燕，為移民付出沉重代價，即使保持家庭和洽，男的亦已犧牲了在香港公司嘅晉升前途，呆在彼邦，令左丁山感慨不已。估唔到二十幾年後，又聽聞有人要搞移民，左丁山一定要講一句不中聽的說話：三思而後行呀，考慮清楚家庭成本及個人職業前途先。以前不少人話移民是為了下一代的教育，今天卻跟隨子女回流香港，上屋搬下屋，隨時唔見幾籮穀。