搶奶粉、搶學位，仲要400萬養大一個小孩，這些都是香港父母要面對的難題，已為人父的黃家強因囝囝是中日混血兒，已入讀國際學校不用煩學位煩奶粉，不過，根據400萬這條不成文定律，有兩子的他要準備800萬養仔金，每月頻撲返內地做騷賺人仔，他強調自己對感情好認真，婚後要對太太忠心，因為輸唔起，不想貪得意賠上幸福婚姻。
撰文：余燕儀
黃家強去年簽約大岳娛樂，最近再度活躍樂壇，月前才開完慈善演唱會，他日前接受專訪時說：「我個個月都要返內地周圍做騷，係咪要400萬養小朋友唔知，但要準備定儲錢，唔係為自己係為小朋友。」雖然其兄黃家駒當年在日本參加電視節目意外身亡，獲得一筆巨額賠償，但家強澄清自己一分錢都沒動用，他沒好氣說：「有邊個唔使做，家駒走咗，Beyond三個其實好安穩，因為Beyond之前做咗好多嘢，真係要搵兩餐唔難，睇吓世榮呀，出面好多機會畀我哋演出，絕對可以養活我哋，視乎我哋要求有幾高，我就好易滿足，有兩餐已經好開心。」
家強坦言不喜歡無所事事，要靠自己雙手賺錢，他說：「你話要靠家駒嘅賠償過活，𠵱家已經過咗20年，如果20年都靠呢啲錢，咁好繽紛喎，同埋我好唔好意思攞呀？就算我想要，畀唔畀我得㗎？我梗係唔會攞啦，如果我有能力，自己攞錢返去孝敬父母，點可能仲要喺佢哋度攞，有冇良心呀？係咪先？同埋我唔鍾意唔做嘢囉。」
身教免仔失禮
除了賺錢外，家強亦樂於參與酬勞少的音樂節，甚至寧願推工作都做慈善，他說：「去探訪係好好嘅生活體驗，過程可以領悟好多嘢，別人痛苦難過嘅經歷令自己成長，見到咁惡劣嘅情況，覺得自己好渺小。」去過很多地方探訪的家強，更學懂珍惜跟家人的相處：「我哋關係從來未差過，冇人係完美，父母對我任何嘢都會接受，可能我好彩，冇遇過太大家庭問題，父母好恩愛。」
家強跟日籍太太結婚8年，安全跨過7年之癢，他笑說：「反而早期嗌交多，我哋拍拖一年結婚，一年有小朋友，適應唔到有磨擦，𠵱家8年冇癢過，我份人好專一，有女人埋身唔代表你要掂，我唔會睇小自己魅力，但唔代表人埋嚟就要，我有老婆有小朋友，對自己感情好認真，要玩就結婚前玩，婚後要對太太忠心，我輸唔起，唔想因貪得意賠上自己幸福。」
兩子之父的家強覺得教仔最重要是百行以孝為先：「自己有小朋友，梗係想小朋友孝順你，我會特登分配時間畀佢哋，父母會影響子女言行舉止，見到小朋友有禮貌即係父母有禮貌，如果小朋友乞人憎，父母都係乞人憎，我唔想囝囝做啲失禮嘢，自己會好冇面。大仔脾氣腍善又細膽，細仔好鬼醒又大膽，似家駒咁奀皮，完全唔似我同老婆。」
同阿Paul未緣盡
提到跟昔日隊友黃貫中（Paul）的關係，家強說：「我哋冇聯絡，我覺得唔使啦，大家分開做嘢，唔同世界，啲人覺得夾band咁多年兄弟好欷歔，但我重申我哋冇鬧交，我係俾人鬧，去到咁嘅局面，我唔想陪佢過呢種生活，你要吵吵鬧鬧唔好拉我落水。我相信同阿榮、阿Paul未緣盡，但緣份去到邊未知，我仍然當佢係朋友。」
