曾志偉去年任職演藝人協會會長期間，爆出「維穩」風波，結果他去年10月請辭，該會上月籌備新會長人選時，志偉欲推舉黃秋生接棒，卻因入會問題令秋生跟秘書長陳芷菁開火而作罷。演協昨進行只限會員的閉門投票，由成龍接任新一屆會長，不過成龍近年被指親中，不時失言惹笑柄，加上經常不在港，令人質疑他是否可勝任演協會長，公平公正為藝人謀福利。
演協昨邀請會員到觀塘會址投票，大會公佈演協現有約840多會員，昨有90多人出席投票，會員事前接獲通知，有興趣擔任理事或會長可列入提名名單，結果成龍繼第三、四屆後，今屆再任會長，而副會長是苗僑偉、唐季禮、任達華及肥媽瑪利亞，陳芷菁連任秘書長，曾志偉則是永遠名譽會長，可參與日後開會，但沒投票權。方力申及錢國偉等昨撐場投票。雖然昨有傳媒採訪，但全被拒諸門外等結果，投票過程及票數都未有公開，欠缺透明度，有黑箱作業之嫌。
肥媽：會長唔使講咁多
出爐會長成龍昨缺席，身在英國的他前日貼微博解畫：「這次來倫敦是為了參加保護野生動物的活動，這是由王子基金會和英國外交部主辦的……威廉王子還說希望我盡快拍《Rush Hour 4》，他很想看，哈哈。」他最初認錯威廉王子為哈里王子，令威廉王子相當尷尬，成龍事後受訪時還笑說：「他們長得幾乎一模一樣啊！」
志偉在會後接受訪問時說：「發生咗上次件事，阿倫（譚詠麟）、成龍同劉德華打畀我，大家有唔同意見，綜合成龍當選最適合，佢係大比數通過當選。雖然佢成日唔喺香港，但佢有好強團隊幫助。我哋有叫華仔諗吓接任下一屆，華仔理念同秋生好似，當日秋生都提供咗好多寶貴意見，佢提出每間機構都要有代表。」成龍口不擇言早有前科，會否怕他在任時又失言？志偉力撐：「有智囊團幫佢，成龍好有國際地位，最可代表演協。」肥媽則搞笑地說：「會長唔使講咁多嘢。」
至於另一副會長任達華指成龍雖忙，大可透過視訊聯繫。而唐季禮表示會借出上海及北京的辦公室作演協內地會址，以助藝人北上搵人仔。之前捲入是非的陳芷菁自嘲未夠班競選會長，並說：「演協會長一定要兩岸三地有地位，德高望重，我係冇可能。」但她爆料指昨沒到場的黃秋生未交會費。
蕭若元嘲遙控離岸會長
就成龍當選，黃秋生表示沒意見，他只說：「支持，佢德高望重。」撐演協日後活動？他說：「有需要有時間先。」至於傳媒人蕭若元則說：「成龍唔係澳洲籍咩？佢一時又話自己係韓國人，有乜資格！佢做過會長，點解唔叫個仔房祖名做，學北韓父傳子。」他質疑成龍經常四圍飛肩負不到會務，提到任達華撐成龍可透過視像通訊？蕭若元揶揄：「即係遙控離岸會長。」他建議成龍首要任務是關心近年生活拮据的藍潔瑛，並提出成龍連同志偉帶藍潔瑛到新加坡報警追究傳聞當年不快事件。
人民力量成員兼前港姐袁彌明說：「成龍當選同志偉做係冇分別，都係嗰班人『維威喂』，話大比數當選，點解唔公開票數？又唔知邊啲係候選人。冇人知候選人政綱，成日話根據理念，係咪即係維穩？等TVB獨大，咁樣係剝削演藝人。佢哋所謂團結，係咪排擠少數人嘅聲音？」她更寸成龍昨日冇影已是有欠尊重。而非演協會員的歐錦棠也說：「做得會長係要為會員謀福利、爭取多啲，但成龍好忙，唔知有冇時間理。」
採訪：黃曉妍、陳杰
網中吟：網民憂言論自由
成龍近年言行出位，故他當選演藝人協會會長，惹起網民熱話。
Power Fox：咁屈就做小小一個會嘅主席呀……
Hung Ma：成龍唔係內地演員咩？畀盧海鵬做好過啦。
Tony Yang：以後所有香港藝人都要向土共討好，不能講出一句心底話……香港言論自由正式入土為安。
獨孤無名：肯定又大把金句有得聽了。
Kameyou HO Kai-lung：睇嚟大家要鼓勵王維基那邊的藝人，開始組織真正的藝員公會才行。
資料來源：《蘋果》facebook專頁