世紀建業（079）澳門底子濃，成間上市公司總市值，得1億幾，係銀河娛樂（027）0.04%，可塑性非常高，冷灶遲早熱煲。
世建總發行3億股，現價（0.495元）挨近八年低位，總市值得1.5億銀。濠賭股當中，龍頭銀娛經歷2008年金融海嘯，最低位跌到得番0.52元，同世建同期股價唔差得好遠。銀娛家陣累升咗137倍，上到72蚊水平，市值超過3,000億銀，係世建市值3,000倍，世建殘到不得了。
重返濠江賭壇不難
但咁睇，世建主要股東已經佔咗52.4%或1.6億股，財政又乾乾淨淨（揸住淨現金2,260萬銀）。而上年到家陣，由內房搵殼注資，到科網龍頭入股上市公司，低市值股一登龍門，升價十倍，大小股東齊齊得益。變身賣殼，亦係大財路，世建有靚殼質地。
又世建喺澳門賭權開放之後，隨即發展叠碼仔業務，兼成為濠江最大嘅叠馬仔企業。集團亦曾經揸住澳門假日酒店及鑽石娛樂廳25%權益。
股東當中，仲包括叱咤賭壇嘅司徒玉蓮，揸咗世建9%。雖則，對上幾年，世建將業務甩手，家陣再冇任何賭業相關項目，但睇番成個背景份量，係超強，世建重返濠江賭壇，又或者拍住大孖沙一齊上，唔難。
上年10月25號主打中國星（326），家陣翻一番，跑贏同期濠賭股，其中一點，就係中國星PB超吸引。世建最新NAV 1.2元，PB得0.4倍，亦有超強NAV墊底。
以世建上番NAV計，現價要升1.4倍，到時，散戶街貨市值，只不過1.7億銀（家陣得7,200萬銀咁大把），只係場內賭業大孖沙市值嘅零頭。
錢雋
細價股專家
本欄逢周二、五刊出