機場管理局行政總裁許漢忠（Stanley）舊年底突然話提早半年離職，做到今年7月就拜拜，航空業內一直盛傳，Stanley唔會就咁退休，應該係有好路數。
噚日佢跟傳媒春茗時就話「以後都會繼續關注航空業」，亦會留喺香港，似係遲吓有新動向喎。
聽聞，國泰航空（293）跟港龍2006年完成合併，Stanley離開港龍後，海南航空集團作為大股東嘅香港航空曾經搵佢幫手打骰，咁啱機管局搵佢做行政總裁，佢當然選擇後者，由2007年初做到𠵱家。
舊年Stanley捲入違規評標風波，事件好似不了了之，但佢忽然喺10月底話提早拜拜。
新跑道早動工可慳錢
雖然Stanley已經62歲，但睇落依然拼勁十足，噚日佢隻字不提「退休」，亦唔似好多企業高層臨走前話自己準備走去遊山玩水hea一輪之類，講明會繼續關注航空業。
Stanley唔談個人動向，但樂意講第三條跑道，預期下月遞交環境評估報告，如果程序順利，有機會明年拎上立法會申請撥款，最快2016年動工。近年基建工程費用不斷上升，佢強調早一個月動工就可以慳多些少錢，加上航空需求增加，每日都有過千班航班，機場確實需要盡快興建第三條跑道。
佢簡單兩句就解釋咗，點解早前否決董事羅康瑞要求修改第三條跑道規劃，以發展機場北商業區嘅建議，因為一改規劃，成件事唔知推遲幾耐。
李華華
mailto:[email protected]