吳千語年紀輕輕，20歲就泊到大碼頭，同坐擁百億身家嘅「廈門李嘉誠」林華國位大公子林峯拍拖。最近有傳千語BB擔心林峯細佬林逸洺讀完書返家鄉打理家族生意，男友嘅長子地位會受動搖，於是教唆林峯退出娛樂圈，叠埋心水做生意。雖然千語BB例牌否認，但噚日有讀者爆料，話星期一晚見到佢去咗上環一間古董舖買送子觀音，唔知係咪想快啲嫁入豪門，畀林華國抱孫呢？
爆料人話見到一身黑色打扮嘅千語BB入到舖內，好心急話明要買一尊已開光嘅送子觀音用嚟求子，仲話幾多錢都冇問題，最重要靈驗。
附屬卡買送子觀音 店員
攞咗個由四川萬寺住持開咗光嘅送子觀音畀千語BB，佢好爽快畀錢，但同場客人就話見到佢用咗張疑似係林峯畀嘅信用卡，個簽名仲同林峯個名好相似。噚日打電話畀千語BB求證，佢承認自己住中環區，成日經過石板街古董店一啲都唔出奇，但就話唔知乜係送子觀音﹕「去文具店買嘢就有，𠵱家得廿歲，唔急結婚，事業為重。」問有冇用林峯送嘅附屬卡？佢話：「自己都有，做乜用人哋，加上簽人哋個名係犯法，簽名都唔會寫正字啦。」另有人報料指林峯打算喺今日情人節向千語BB求婚，仲訂埋一間好有情調嘅餐廳準備送上驚喜。
撰文：馮仁昭