李慧玲俾商台粗暴解僱，佢指商台因為續牌而向政府跪低，矛頭直指梁振英。大家根本唔需要再估，係人都知係十年前郁大班、毓民翻版。特首選舉時唐英年公開指出當年梁就係在行會內提出以縮短發牌來控制商台言論取向。十年前仲文明小小，俞琤仲會上節目解釋，同大班對質，今次直情當你班人儍，解釋都冇，嗌一句金句就算數。
商台做生意，點會唔緊張商譽品牌，俞琤又點會唔記得十年前封大班咪慘痛教訓，佢咪前出醜跌眼鏡，成為笑柄，而十年來商台因為呢單嘢，冇好過，唔單止個朵臭，廣告生意亦唔得。大家諗諗，明知後果咁嚴重，都要用咁粗暴手法去叮走李慧玲，可想而知背後政治壓力有幾大。
《明報》張健波會唔知空降馬拉老總好大鑊？當然知，但張曉卿仍然要做，背後施壓者出幾大力，大家估計到。同樣，唔妥肥佬黎非始自今日，十幾年都唔妥，但始終冇用粗暴手法逼外資企業抽廣告，今次為迫渣打銀行抽廣告，就出動到杯葛渣打馬拉松。
自由黨田少寸嘴唔聽話，十幾年都冇變過，政府以前只會揸頸就命，唔會由特首落命令，要求所有官員集體杯葛自由黨黨慶。
大家唔使有內幕消息，只要將所有呢類事件拼湊一起，就會知道幕後黑手，好大機會就係梁振英。
梁振英擺明撥火
呢類政治手段，當然唔會在現場留低手指模，但環境證據已經好清楚，李慧玲、劉進圖、游清源，根本就冇針對北京作批評，佢哋批評對象係梁振英，甚至唔係針對特區政府政策。大家諗諗，邊個會用律師信去對付《信報》專欄作者練乙錚，有乜人會落區動用小桃源系人馬護航？有乜嘢人會擺明車馬，公開表明作公職政治背景審查。
香港人面對呢個局面，社會對立氣氛只會更嚴重，市民更加對內地一切反感。梁借打擊反對派之名，實際在搗亂，越亂佢就坐得越穩陣。上邊正因整黨反貪、處理周永康一事而自顧不暇，港澳辦擺明唔妥，但又奈佢唔何，至多述職時抽抽水，叫佢找到不足。但一轉頭返香港，就變本加厲，四處去砌人郁人。尤其今年面對政改及佔中，理應製造和風細雨局面，而非去撥火，擴大矛盾。
徵入境稅一事，盡見佢搗亂心態，明明可用政策性原因否決，一如葉劉論調，但佢偏用撥火態度，以未富先驕訓斥港人、擺明就要越亂越好！
添馬男