上面個標題考吓你，乜傢伙叫做「恰披蛙卵攤屍地」？唔係講喪屍又唔係講動物生理，其實就係今天，即係2月14，普世狂歡Happy Valentine's Day！廣東話繙譯英文，聲、意齊全，兼且別具趣味，摷勻全中國都冇一種方言可以相比，所以早前教育局亂扣帽子話廣東話無認受性地位，簡直一派胡言兼歪理，幸好廣大巿民齊心抗議聲討，佢哋先鬼鬼祟祟自動收皮。
講番「蛙卵攤屍地」，其實係外國嘢，喺香港幾十年前先算做興起，幾十年前如果同拖友慶祝情人節，分分鐘俾人笑肉麻兼骨痹，買花送畀女朋友，又驚似拜山咒佢死，所以話晒大家都係中國人，佳人有約梗係喺元宵，賞花觀燈扮才子佳人咁先夠情趣細膩。
但世事輪流轉，話咁快香港經濟起飛，消費主義抬頭，要肯使錢先至係大道理，𠵱家你試吓叫女友元宵去維園猜燈謎，佢真係睬你都有味，佢話：「有米先好學人媾女，冇錢就唔該死返屋企！」
講金至上講心包尾
所以今時今日21世紀，令到一眾男士心率不正腎上腺爬升，等足一年落足心機，無非想喺呢日博紅顏一笑，事關食粥定乞米都要睇2月14，如果𠱁得條女開開心心，晚黑分分鐘有得上扯旗山扯旗；若然稍有待慢或者唔夠派頭，咁呢段感情就可以冚旗。
事情可大可小，欲生必先置諸死地，男士深明此道，所以早幾個月就要開始為呢日籌備，book定枱食豪華情人燭光套餐，兩位盛惠港幣1314，一生一世咁好意頭，縱然肉赤合埋眼都要畀，雖然望吓個餐牌，原來主菜只係一份羊髀，加份甜品梳乎厘，食完唔夠飽肚，但係埋單就冇咗千幾，一路畀錢一路笑騎騎，其實額角有汗兼心念「你鹵味」！仲有必定要送玫瑰，不論買少至一支定多到90幾支，都要用華麗浮誇七層花紙包起，總之要做到人有我有，唔係出街點樣同人比？
搞到每年呢一日，明明只係深水埗檔口仔，一支玫瑰收你$60都夠膽死，又唔係清明又唔係7月14，出街總見鮮花遍地，單純愛情變相用金錢衡量，講金至上講心排第尾，原本表達愛情貞忠至死不渝，如今失去節日原有意義實在可悲。
所以在此奉勸各位男士，唔好以為自己冇say，有責任灌輸正確意義畀你伴侶，無謂因門面排場生氣，你話阿棠教落：「愛量以錢為賤，情重以真為稀」，祝天下有情人終成眷屬，鶼鰈情共效于飛。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登