依家嘅學生遠比左丁山一代幸福，學校設施遠比以前完善，教育經費遠遠超過從前，大人物不時放下身段，到學校與學生分享讀書、學習、研究經驗，喺左丁山讀書年代，真係發夢都唔敢。至於考試壓力大喎，舊時你估會少啲咩，我地於考大學之時，中學畢業生之大學入學率係2%以下，現在閒閒地都有18%啦。
呢，最近有報道話兩位諾貝爾獎得獎者來港，主持中學生講座，主題係「諾貝爾獎學人生命之旅」，講座在二月二十七日舉行，講者分別係2010年化學獎得獎人，日本科學家根岸英一，另一位係2009年化學獎得獎人（第一位中東女科學家，以色列人）艾達尤娜特。佢地來港交流，自不然有人邀請，有人贊助先至會成事，在在顯示今天香港有資源與其他地區競爭，不比從前。
前中文大學校園發展處處長林泗維去年退休，左丁山有一次在中大碰到佢，問佢有冇從事「無糧工作」，佢話「有呀，一份幾需要精神時間嘅無糧工作就係做咗閩僑會館理事長兼閩僑中學校董，閩僑當然唔係一級名校，需要年年努力招生，咪盡吓努力囉。」哦，林泗維係建築師，處理中大興建各式各樣大樓，從未難到佢，但落實到如何教育、培養非精英學生成材，就認真係大挑戰。林兄勝在面子夠，今年五月閩僑中學畢業禮，邀請到鼎鼎大名之1996年諾貝爾經濟學獎得主Sir James Mirrlees莫理斯爵士，中大晨興書院院長到校主持並演講，順便與學生交流。你話一個唔覺意，有一位學生咁多啫，與Sir James交流之後，得到啟發，努力向上，他日成為經濟學教授嘅話，咁就唔得了。
左丁山問過林泗維，香港家長好現實，選校要睇入大學成績，「你地交唔交到差呀？」林兄話：「閩僑唔係皇仁、聖保羅男女，不能與人相比，大家嘅起步點（即中一入學生水平）都有差距啦，但我地肯定有增值value added噃，去年有兩位文憑試考生入港大，一位入演藝學院，叫做唔錯嘅嘞。有80%畢業生繼續在國內外升讀大學，全憑我地嘅老師的努力。」
（按：明日星期六下午三時土瓜灣新亞中學有新亞文化講座第七講，由唐端正教授（新亞第二屆，唐君毅弟子）主講「儒家思想的特色」，歡迎各界人士到場聽講。）