全城噚日晏晝坐定定等睇李慧玲記者會，有行家喺fb嘅status話「李小姐爆料了」，竟然惹嚟新聞統籌專員（IC）馮煒光出手留言挑機。雖然今次真係冇多冇少留咗三個字，但繼續出醜，將「冇乜料」寫成「冇物料」（圖），又質疑李小姐冇正面回應問題。結果反被人寸佢「冇咩物料？！ 膠料定布料？」兼且惹嚟全城行家留言狙擊。有人質疑「乜咁得閒嘅專員？」亦有人反諷「咁樣做IC工作都好新穎，兼夠即時。真的從未見過！」既然IC送上門，有行家順勢追問「特首有冇喺早禱會話過全香港最憎嗰個就係李慧玲？」IC一味話冇聽過，但冇回應狼英有冇講過囉。原來馮煒光同時喺另一人嘅fb留言，反問《左右大局》主持人黃潔慧「有乜好喊？」似乎呢位IC太得閒，可以不停上fb。