觀眾最期待的畫面出現了！商台連日爆發政治風波，碰巧今集《亂噏24》嘉賓，正是商台首席智囊、前行政總裁陳志雲。志雲與黎智英兩大傳媒巨頭碰頭，未roll機已聞到火藥味。節目上蔡瀾和肥佬黎左右開弓，企圖塞志雲入櫃，令平日處變不驚的志雲也口震震呢。節目足本版逢周四晚上11時播出，讀者可在 http://bit.ly/appletalk24重溫。
撰文：馮國康、Sidekick
壹傳媒被無綫無理封殺，陳志雲身為無綫前高層，成為《亂噏24》嘉賓，少不免被追問此事看法。肥佬黎快人快語，節目甫開始已搶閘問道：「如果你喺TVB，會唔會封殺壹傳媒先？」然後道出幾年前《壹本便利》亦被他封殺過。志雲呼冤：「嗰次唔係我，嗰次係演藝界！」原來對上一次是肥佬黎私下約志雲解決事件，他認為假若志雲仍在無綫，那無綫跟壹傳媒的關係未必變成僵局。志雲說：「其實你嘅問題好易解決，我叫你講啲嘢，咁你又唔肯講，『對唔住』三個字咋嘛，你諗咗咁耐諗到點講未？」肥佬黎說：「我又冇乜特別去想，老實講，你封殺我等於我封殺你。」他留意到員工比以前更積極，士氣更旺盛，畢竟大家將這件事當成一項挑戰：「我𠵱家話想唔封殺都唔掂呀！你千祈唔好唔封殺我呀！你繼續封殺，歡迎封殺！」蔡瀾笑說：「佢係以俾人封殺而生存！」眾人大笑。
爆陳淑莊戀事
不過，志雲始終不信肥佬黎的「歡迎封殺論」，問他為何當日要出面為《壹本便利》調停？肥佬黎不加思索便說：「因為你吖嘛！」志雲大驚：「你呢啲叫做put me on the table！」肥佬黎認真解釋，稱因為當日雜誌實力不夠，未必能扺受得住封殺，再者他認為雜誌的確過了火位，理虧在先，但今次明顯不同，他說：「全香港人對呢件事嘅情感同我哋一樣，你要封殺咪封殺囉，睇吓你死得快定我死得快，歷史就係最好嘅test，哈哈！」志雲企圖將話題一轉，笑稱肥佬黎十分「寸嘴」，陳淑莊（Tanya）說：「寸就從來㗎啦！佢唔寸你仲驚喎！」肥佬黎自稱性格就是受軟唔受硬：「你越腍，我就越腳軟；你越同我硬，你硬得過共產黨？」
志雲見嘴巴鬥不贏肥佬黎，惟有轉向身旁的「小妹妹」Tanya埋手：「點呀識到新男朋友未呀？」又取笑對方喜歡結識成熟型男士。Tanya反駁：「唔係喎，呢輪傳我同年紀細（拍拖）喎！」前年有傳她與Rapper MastaMic撻着，志雲說：「我唔信。佢鍾意親都係大過佢年紀好多嘅。」蔡瀾追問：「鬈毛（岑建勳）呢？」Tanya反應甚大的說：「我借呢個機會澄清一下，冇咁嘅事！」
無綫守舊致命
眾人講到近年崛起的新媒體。肥佬黎坦言報紙銷量下跌是不爭事實，志雲則認為電台的收聽率不太受影響，他說：「憑每一年調查，冇見到跌嘅走勢，但新媒體就可以見到一個好大升幅。」至於收視率的計算方法從來是「千古之謎」，蔡瀾趁機會向志雲討教。志雲指出獨立調查公司會根據人口分佈隨機抽出850戶家庭，在他們的電視機上安裝一部機器，每當住戶按遙控器收看電視，數據便會傳達至調查公司作記錄。肥佬黎質疑數據的認受性：「850戶就代表全香港？嘩，同特首選舉差唔多喎！」
沒有精確的收視數據，變相令無綫節目質素下降，肥佬黎說：「20年前嘅無綫電視質素都好過𠵱家。」志雲處處維護舊主：「製作水準𠵱家進步咗好多，當然你話編劇水準，永遠都有空間。」肥佬黎認為守舊的劇集方程式，會直接拖垮電視台：「用formula代替創作，係電視台節目仆街嘅主要原因之一。」他又指出無綫收視之前高見40點，現在卻只有21、22點，他笑說：「尤其係封殺我哋之後！」
談出櫃口窒窒
蔡瀾見時機成熟，單刀直入問志雲的性取向：「明哥（黃耀明）出櫃嘞，你幾時？」對於突如其來的提問，平日處變不驚的志雲也口窒窒：「你你做乜要無端端擺我入櫃裏面？」肥佬黎幫口：「咁你係咪喺櫃入面先？」志雲甫定神，便反問二人的問題是否「陳志雲係唔係同性戀者」，然後自答：「我答你係同唔係，係好簡單，但我覺得每個人都有少少底線，就等於我問黎智英你今日條底褲乜嘢色？」誰知肥佬黎爽快答：「白色！」眾人大笑。肥佬黎又引用朋友一句話：「攣的直不了，直的攣不了。」令志雲頗為尷尬。
前無綫高層避談封殺 媒體戰各不相讓
http://bit.ly/talk243101a
陳志雲赴鴻門會 舌戰群儒一打三
http://bit.ly/talk243202a
志雲寸蔡瀾 笑佢個布袋似化緣
http://bit.ly/talk243103a
850機盒計收視 衰過選特首！
http://bit.ly/talk243104a
大台唔敢嘗新 創意工業死梗
http://bit.ly/talk243105a
語言偽術博大精深 志雲大師隻口遮天
http://bit.ly/talk243106a
再談李慧玲 陳志雲怕咗女人
http://bit.ly/talk243107a
明哥出櫃了 幾時輪到陳志雲？
http://bit.ly/talk243108a
ENT24_31P9:人人揸住部手機 報紙遲早冇碇企
http://bit.ly/talk243109a
news24_31p10:獻計搞動新聞？余詠珊險惹官非
http://bit.ly/talk243110a