美國聯儲局主席耶倫周二首度登場，發表首份貨幣政策報告，結果合乎公眾期望，繼續力撐前老細伯南克嘅有秩序退市方針，重申加息路仍遠，為環球市場消除陰霾，美股近日抽番上萬六點邊。市場預期美國未有耐加息，加上市場氣氛改善，美金呢兩日走勢偏弱。
耶倫當日話，美國經濟舊年下半年起加快復蘇，之前兩個月嘅職位增長雖差強人意，但未成復蘇障礙，佢將貫徹伯南克嘅路線（a great deal of continuity），以數據為依歸有序縮減買債。佢特別提到唔滿意職場現況，話半年冇搵工嘅人太多，現處6.6%嘅失業率，未能確切反映實況，重申只要失業情況及低通脹是但一樣唔得，都唔會㩒加息掣。
搞笑嘅係，英美兩國央行舊年不約而同搞利率前瞻指引，原意係想安撫市場，費事佢哋以為就快加息，點之兩國嘅失業舊年年中落得好快，而家同加息門檻僅差0.1個百分點，市場遂揣測息魔可能提早現身，所以兩間央行呢幾個月已補定鑊先，話失業率門檻只係其中一個參考，低息環境仍有排玩，回頭看真係阿茂整餅自己捉蟲。
伯南克為挽狂瀾於既倒，任內不惜狂印銀紙救市，令全球在其打造嘅「紙牌屋」下，安然度過這次危難，剛上場嘅耶倫打穩陣波，繼續慢拆紙牌屋亦理所當然。至於佢心底有乜盤算，估計都要等3月議息會至見真章，面對失業率觸及加息門檻，專家唔排除佢屆時會剔除失業率指標。事實上，聖路易聯儲銀行行長布拉德早兩日亦鼓吹重質不重量（qualitative vs. quantitative），建議放棄失業率指引呢啲硬數字，要以經濟基本環境為依歸，不排除是為將來改制造勢。
英鎊中線望1.7美元
正如開首所講，美金本周勢弱，當中以英鎊表現堅挺。英倫銀行周三發表季度通脹報告，將今年增長預測調高到3.2%，比原先估計高半個百分點，又估失業率好快落到7%，較之前預測足足早咗兩年，雖然央行暗示經濟未復元，最快出年至加息，但市場就估計失業率今年滑落至6.5%，不排除今年年底就要展開始周期。消息刺激英鎊昨日曾抽上1.6653美元，好貼近上月底嘅近兩年高位。
IMM最新資料顯示，雖然英鎊好倉近期有所下降，但短期要突破1.6668美元嘅兩年高位應該唔難，要挑戰1.7美元關口，就要睇英美數據同市場氣氛就唔就，但相信中線就有機會達標。
上個禮拜表現最靚嘅澳元，呢個禮拜跟隨經濟消息相當反覆，該國1月企業信心升至近三年高位，刺激澳元周三升至90.68美仙嘅一個月高位，但澳洲噚日公佈1月失業率升至6%嘅十年高位，澳元即被打回原形，一度跌落89美仙邊緣。不過，好多專家都認同，澳洲央行暗示減息周期結束係一個轉捩點，澳元應該仲有排反彈，短期可趁低吸納。
奇兵
本欄逢周五刊登