今日係雙料情人節（元宵與西方情人節同日），仲要係星期五大家要返工嘅日子，男友或老公唔想俾人送個黑面，除咗訂枱食飯，送花去愛人嘅寫字樓可能亦係指定動作。
中環IFC商場入面一間花店，噚日已經放滿訂好包起同埋準備包靚佢嘅花，場面墟冚。
情人節呢個重要日子，花價當然唔平，仲要喺IFC，呢間花店講明最低消費1,500元，包好一束玫瑰起碼2,000元左右。行遠少少，金鐘太古廣場入面一間花店，12至24支玫瑰花最受歡迎，價位大概1,000至2,000元。據講，昆明舊年底出現大風雪破壞唔少花田，影響玫瑰供應確實拉高今年花價。