齋用兩翼傳中，當中最大嘅錯唔係「兩翼傳中」，而係個「齋」字！獨沽一味，只用一套戰術，無論你呢套戰術幾咁出色，對手都好容易防守。就算你搵姚明做中鋒，如果只係齋靠傳中，亦唔一定有用。
費格遜同莫耶斯都係崇尚兩翼，但費格遜嘅曼聯絕對唔係齋傳中；喺每次傳中前，球隊都會做好多工夫，去提升傳中嘅質素。當翼鋒同閘位球員喺邊路尋求傳中機會時，費格遜嘅曼聯係唔會夾硬嚟，覺得機會唔好就回後，畀番中場再搓過。
搓波嘅作用係等待機會，等對手防線嘅漏洞出現，之後用最簡單同快捷嘅方法再傳去邊線，把握對手嘅疏忽，翼鋒可以有無人看管或者單對單嘅機會，睇清睇楚禁區嘅形勢先傳中。踢兩翼傳中係應該咁踢先啱，要加上邊線同中路嘅配合，而唔係齋喺邊線起腳，斬、斬、斬！
講戰術，近年公認最先進嘅可能係巴塞隆拿嘅Tiki-taka，但點解巴塞都會試過喺歐聯俾國際米蘭守死，又試過被拜仁慕尼黑屠殺呢？佢哋就衰在一個「齋」字，重覆咁去踢同一套戰術太耐，遲早都被人識穿，睇到當中嘅罩門，所以做教練一定要不斷改善現行嘅戰術，絕對唔可以用死一套。
兩翼傳中嘅道理一樣，呢套老舊式風格亦有佢嘅生存空間，但要配合其他戰術一齊用，先可以發揮到作用。總之一句講晒，齋用咩都好，結果都唔慌好。文：咖喱