資深足球評述員曾經以「蔗渣價錢打出燒鵝味道」，嚟形容莫耶斯帶領愛華頓實而不華嘅風格，不過轉任曼聯，莫帥卻嚟一個「燒鵝價錢打出蔗渣味道」，周日被富咸逼和，矛頭更指向全場高達81次傳中，被網民譏為「X斬戰術」。
其實一個入球精采與否，都會喺分牌加1；兩翼傳中只要換嚟入球，根本不含貶義。紅魔以往成功，兩翼齊飛更加係費Sir招牌殺着，由沙柏、簡察斯基、傑斯同碧咸，到C朗同拿尼，都係紅魔不同時代雙翼。坦白講，對富咸一戰，曼聯傳中球嘅落點唔係太差，不過莫帥似乎忽略傳中轉化為入球嘅重要元素：高效能中鋒。
沙柏、簡察斯基可以傳中畀簡東拿同曉士，傑斯、碧咸對象有「黑雙煞」，C朗可以交畀雲佬，小弟絕唔係睇小尹佩斯同朗尼，不過兩人唔算係擅頂之人；無錯兩人曾經都有唔少頭槌入波，但多數係靠走位拉開防守球員，而唔係同後衞硬碰硬爭頂，靠身位頂贏對手。最吹脹係，莫帥比賽尾段仲安排朗尼踢中場，就等於將佢嘅威脅力減半。
戰術從來都冇對錯，只係運用時能否配合天時地利人和，莫耶斯要運用傳中濫炸戰術得宜，短期就要靠費蘭尼傷癒，用爆炸頭打中鋒，或者7月再施銀彈，以5,000萬鎊以上嘅價錢收購迪亞高哥斯達、法卡奧等中鋒，由3,800萬鎊嘅桑馬達傳中，呢啲先叫「燒鵝價錢打出燒鵝味道」。文：牽牛