教院出名靚女多，新任校長張仁良都好受交流生歡迎，仲同交流生一齊煮湯圓，兼請記者試食！嚟自英國、美國、台灣同福建嘅同學仔，噚日一齊同張仁良煮飯仔，啲湯圓聲稱係交流生整㗎，有桂花伴住，味道同出街買嗰啲都好似，有行家發現咗湯圓尾部有個類似機器切嘅位，八方咪問下外國妹妹整湯圓整咗幾耐，有個妹妹就好坦白話，佢冇份整。
活動完晒，啲英美交流生仲捉住張仁良影張相。張仁良講開學外語真係好緊要，特別係法文，追女仔好有效，怪唔得追到個法國女仔做老婆！張仁良噚日仲講錯嘢，佢話教院開校至今幾十年地位「不願置評」，原來佢係想講「毋庸置疑」。