潮流興A B餐。
趙式芝的A B餐是這樣的，A 餐：五億嫁妝＋老公；B餐：＄０＋同性伴侶楊如芯(Sean)，答案全香港人也知道。
作為上世代船王趙從衍孫女、卓能集團主席趙世曾女兒，趙式芝2012年公開了和同性愛人Sean的婚姻關係，成為香港上流社會公開同性婚姻的第一對。兩年過去，爭論還未結束，爸爸將A 餐加碼成十億，「公開婚姻是改變我一生的錯！」笑住說，卻不會後悔回望「Ｂ餐只可以是Sean，不考慮any woman。」堅定的愛宣之於口。結婚，下一步自然是生仔，太太開始想要子女，她認為時機未成熟，仍在掙扎中， 「擔心BB一出世就要面對評論聲音」。
採訪：林妙萍
攝影：周樂恒
訪問前幾天，趙世曾五億嫁妝向全球男人招婿的鬧劇，加碼到十億元，趙式芝要向爸爸寫公開信叫停，事情才剛告一段落。拍膊頭急call她受訪，明知會又再成為話題，趙式芝也笑住應承，飛去吉隆坡探Sean家人前的下午，在辦公室笑談這兩年的婚姻。「最大分別是要派利是，我今年派咗250封利是，好誇張囉！Sean只要見到一個阿嬸，就算係對面馬路，都會即刻跑過去，冇大封利是，就俾夠四封，我話，人哋咁大年紀，似乎唔好意頭，佢話，咁點算，我話，你應該俾八封囉，哈哈哈哈！」
趙式芝和楊如芯之間，就是這樣一種的關係。趙式芝坦言當初結婚，是對伴侶的承諾，也希望讓Sean的家人放心，從無想過要公開婚姻，因為預期不到的人和事，最終公開了，成了全港各報頭條，「（公開）真係改變我一生的錯！錯有錯着啦，當然不公開會簡單好多，生活會簡單些，𠵱家多咗好多複雜性，面對好多評論，又有好多同志組織又覺得係一件好事。」趙世曾向全球招婿，媽咪姚煒不承認，父母不接受，吵吵鬧鬧，但事件也令香港的同志平權運動踏進一個新里程。
生BB 等時機
下一步是生孩子？「好複雜呀呢個問題，𠵱家仲未傾掂，仲係拉鋸當中， timing問題，timing𠵱家唔係咁好。」太太Sean想要小孩，兩人未就如何「生」達成共識，代母或人工受孕也在討論中。「領養嘅意義就大啲，我自已陀都冇所謂。」不介意親身上陣陀，但坦言有心理障礙：「因為有太多恐怖、無聊嘅人，話要捐精子俾我嘅，我已經嚇驚咗，收到太多求愛，話唔要錢，要捐啲精子俾我，太恐怖啦。」趙式芝小時候覺得要成為人母，人生才完全，現在在香港經營家族的地產生意，不能移民，子女要在香港成長，令她的考慮又多了一層。「好戥個BB擔心，香港仍然係一個好保守嘅地方，驚佢會遇上，唔可以話係歧視，而係面對傳媒，好多反對聲音、支持聲音，put it this way，係評論嘅聲音，對佢唔係太公平。」外國不少同性戀者也會生兒育女，領養或找代母生，在外國不是新鮮事，如果兩人生育，肯定又會在本地揭起另一場爭議，「如果我未返香港，可以喺美國、英國、歐洲生，𠵱家要work out到，時機成熟先得，𠵱家我哋之間係有不同盼望。」有子女的話，趙式芝自問將是一個嚴格的媽咪，「要求有分析能力，控制自己嘅情緒，遷就別人，禮貌等。」
五億的故事
生性風流、不婚主義的爸爸趙世曾強烈反對她的婚姻，更想出奇特的五億招婿方案，變了一場又一場的大龍鳳，香港海外也哄動，到底趙式芝有無一刻嬲過趙世曾？「我封信都講得好清楚，嬲呢樣真係冇，對我嚟講，憤怒是一種工具，唔會輕易用，我覺得佢幾得意，幾可愛，好有創意，佢嘅出發點係愛，但第二次加碼就開始瘀，真係要停喇。」至於那五億的故事？其實是來自趙式芝的飛行教練，有一次教練見她一兼多職，提問她到底多少錢對她來說才是足夠，「大部份嘅哲學家話，係冇『足夠』呢個概念，只會想要更多。喺我理解，好多生意人，其實身家、財富，就如同打遊戲機嗰個數目，game over時，嗰個排行榜上，abcde，有你個inital，係一種累積，代表你人生嘅價值嘅累積，所以係冇『夠』呢個字，等於你打機，係冇幾多分係足夠，啱嗎？」飛行師傅由一千萬，數到五億，以息口三厘計，一年有1千5百萬，足夠買飛機，周末她和趙世曾吃飯，分享了這個故事，五億這個數目就植入了趙世曾的腦海，五億就是等於一個舒適的生活，可以改變她性取向的誘因。「對我嚟講，父愛係一種尊敬，我同爸爸嘅一種溝通啦，一種默契，一份喜悅。」
