【銅鑼灣】現年48歲嘅一代性感女神李麗珍，佢嘅感情之路可以用曲折離奇嚟形容，同佢拍過拖已知嘅圈中人就有填詞兼電影人潘源良、許愿、髮型師Jacky Ma等等。近年同當年嘅情人潘源良翻撻，好多人都替佢哋開心，都叫有情人終成眷屬。佢哋已經係圈中公開一對，成日出雙入對，不過就好低調，前日下晝又見到珍妹呢對情侶當街耍花槍。
會合冇偈傾
話說前日6點幾喺銅鑼灣，見到潘源良揸住架車喺白沙道放低咗珍妹，之後珍妹就入咗一幢醫生林立嘅商業大廈，相信近排天氣唔好珍妹抱恙要睇醫生，潘生就費事泊車，喺附近不停兜圈等佢。大概半個鐘之後，相信睇完醫生後嘅珍妹黑口黑面咁落樓，心火盛嘅佢見到男友架車未到，就更加火上加油，塊面黑過墨汁不停打電話催潘源良現身。
眾所周知，今時今日嘅銅鑼灣已經淪陷成為強國人集中地，條馬路多人多車，兜一個圈都唔係一時三刻可以做到。病仲加上要等足成10分鐘至見潘源良出現，珍妹上車時面色有幾難睇，大家都可以估到。知道出事嘅潘源良使出男士最專長嘅以不變應萬變，就係唔出聲，見佢哋停咗幾個燈位都冇傾過一句偈，不過睇嚟都係耍吓花槍箒。
採訪、攝影：徐錦池