完美示範佔領郵輪嘅元秋蔣麗芸確係與別不同，人人新春派利是，佢一反傳統派膠。可能民建聯早年被爆用幾十萬蚊公帑印利是封捱轟，元秋今次學精咗，唔整利是封、改整膠製小手袋，而且用自己錢整，七蚊一個、整夠一萬個，即係新春豪派七萬膠。
講番佔領郵輪，佢噚日同傳媒團拜時猛咁申冤，話實情佢早一晚已經勸同船團友上岸先傾，無奈旅客眾多，佢又冇咪在手，唔夠人大聲，仲被人勸佢返房早唞。企喺元秋旁邊嘅譚耀宗即時插嘴幫口，一邊話元秋都係想做協調人，一邊又話元秋都可以做好啲嘅，唔知係咪都知道元秋呢鋪確實處理不當？其實元秋應該學吓立法會主席曾鈺成咁，曾鈺成新年都係坐郵輪旅行，但人哋坐嘅係皇家加勒比國際郵輪，聽個名就知係勁嘢，點會出事呢？