雖然天主教香港教區榮休主教陳日君樞機退休後，冇乜參與教區日常事務，但係仲有唔少教區人員同教友好掛住樞機，好似一班天主教正義和平委員會成員，包括幹事孔令瑜同甘浩望神父等，就喺年初三去到柴灣慈幼修院同樞機拜年，大家仲一齊拎住張「正義和平」揮春影相！
八方睇到張相，見到樞機不知幾精神，當日一班正委成員仲同樞機食飯，因為樞機有個習慣，年初一到初三都會親自下廚煮紅燒肉，唔少人食過「樞機紅燒肉」都大讚，但唔係人人可以「偷師」學樞機點煮紅燒肉，因為佢有個規矩，就係煮嘢嘅時候，唔畀女人入廚房，即係話女仔要跟樞機學煮紅燒肉就唔容易！當然同樞機食飯，唔可能淨係食紅燒肉，餐飯嘅其他食物就由慈幼修院其他修生煮，食過嘅人都大讚好味。