莎莎（178）日前公佈農曆新年銷售數據，新春首七日嘅同店銷售增長，竟然只得3%，堪稱係近三、四年以來最差的表現。不過奇怪既係，生意唔好只限於喺長假期，反而平日銷情就仲OK。如果睇晒1、2月至今，同店銷售係有14%升幅（雖然呢個數字係未計舊年農曆新年喺2月中旬、比較基數會較高的因素），都唔係太差。以前大家會話，趁節日假期、黃金周既時候，可以炒一轉零售股。𠵱家？似乎要掉番轉頭了。
今次莎莎的數據，連埋上次10月黃金周時的疲弱表現，已可確認一個事實：自由行組合的轉變，比大家想像中來得仲要快好多。Day trip客數目急速增加，閒時就落嚟掃面膜、藥油，平均消費唔會太高；反而真正會過夜、使得多錢的旅客，增長就大幅放慢。去年10月至12月，香港整體內地旅客增長11%，但當中過夜客的升幅，平均只得5%；反而day trip客的增長，係16%。
自由行政策點走，你同我似乎都無得揀。分析員朋友話，day trip旅客的激增，現在只是剛剛開始，隨着未來更多中港基建項目落成，加上滙率差距再拉闊，會加入呢個「一小時生活圈」的內地人，肯定越來越多。尖嘴、銅鑼灣再塞唔落人咩？佢哋會自動轉攻北部。所以零售商嚟緊要做嘅，應該係跟住個鐵路沿線開舖。而海迪要做既，就係考慮搬屋，再搬去更偏遠的地方了。
海迪