最近有人討論粵語方言會唔會俾普通話取代。有老友問:「喂,你用廣東話寫專欄,如果普通話盛行,你個專欄要收檔咯喎!」假如有此一日,收咪收囉,冇所謂之至。記得1997年,肥佬黎要左丁山開一個欄之時,左丁山話全部名采版都用書面語(白話),左丁山如果用廣東話寫,會唔會破壞全版格調?肥佬話:「最緊要有人睇,冇收視時我一定飛咗你,識你好耐都係咁話!」哦,此乃江湖規矩,市場法則,冇得反抗嘅唧。點知一寫十六年幾,讀者遍全球,可見廣東話專欄,未必冇市場。最近有啲感動,係昔年新亞書院嘅大一國文老師親筆來函讚在下一句:「料不到你的廣東話專欄可以寫得如此精彩!」記得在新亞上大一國文,要用毛筆作文交功課,係全港大專所無,崇基聯合同學皆取笑新亞老土,但若非當年有一番古文根基磨練,今日寫稿,用廣東話未必如此熟練。
本地中學現時中文課程,只教語言,不教文學,讀語言又唔准教古文、背書,於是本地生中文水平(平均計)日降,現時中學教中文好似視之為第二語言,教英文視為第一語言(唔准教文法),實在顛倒。一位專欄作家李偉才在信報專欄(二月十日)講到:「語文教育的陷落是新自由主義勝利的結果」。又講到:「現代教育是赤裸裸地培養資本主義制度下的受僱者和消費者」,言下之意,之前教育局否決背誦、不准教古文,乃資本家、資本主義之錯。
左丁山不敢苟同,香港資本家極少干預教育,中學如何教中文、英文,係一班在外國吃過洋水的progressive liberals(前衞自由派,即前衞左派)控制本港教育思潮嘅專家諗出嚟嘅,呢批人最唔喜歡保守(即背古文),認為求學不是求分數(理想派認為,學英文背文法規則係扼殺學童學英語之興趣,背誦中國古文更係古老石山。)殊不知美國、英國公立學校教育失敗,學童之PISA排名遠落後於香港,就因為教學太自由之故,前衞人士將呢套嘢移植香港,有乜辦法唔死!香港語文教育若有問題,千祈唔好郁吓又賴埋資本主義呀。