施政報告放煙花式派糖，令經常開支大增二百億，起初諗住民望大反彈，殊不知食相太難睇，民粹式派糖引起中產及傳媒不滿，加上財政司唱反調，大談香港盈餘有乾塘一日，梁提高民望大計被打沉，根據最新香港大學民意研究計劃最新民調顯示，梁振英最新評分為47.9分，較上月稍升0.9分，但支持度淨值下跌6個百分比，民望淨值去到負32個百分比，回落到施政報告發表前水平。鍾庭耀分析認為，施政報告民望效應已經減退。
行政主導體制逐漸變質
我預計佢民望會再插水，由表現失敗再跌到表現拙劣之列，政治上梁振英已經係一個喪屍，掂邊瓣，死邊瓣。
扶貧本身係冇太大爭議，至少政府佔據咗政策道德高地，泛民都好難反對。但一落入梁振英手，寫入咗施政報告，就變咗「別有用心」，為自己民望亂咁派。此乃喪屍效應，一俾佢掂親就發出異味，歸根究柢，源於市民對呢條友冇咗信任，認為佢冇誠信，包庇陳茂波，討好中聯辦，兼且搞梁營小山頭搶佔公職，上任年幾時間，不單冇重建市民信任，反而大搞政治鬥爭，製造亂局。而將政治鬥爭引入政府，又再進一步削弱政府支持基礎，四方樹敵就當作八面威風。
梁之所以明目張膽，為所欲為，不論市民及北京均無可奈何，正因為現實上冇方法制衡特首。行政主導體制正逐漸變質為「行政長官主導體制」，即特首獨裁體制。以往約束特首乃一套不成文規範，如特首會同行政會議審批，雙方意見分歧，特首唔會硬去，港視發牌一事，顯示特首權力之大，可以凌駕一切程序。行政主導體制骨幹本來係以政務官一套既定決策及規劃程序為本，官僚程序自九十年代開始走向公平、公正、公開透明化，設立法定上訴機制，又有行政申訴渠道。香港所謂良好營商環境，正在於呢套行政制度。梁上任前已計劃架空財政司，以押後施政報告食埋財政預算，矮化財政司地位，且將政府內部資源分配大權搶過來。第二步就係用體制外之梁粉，不斷另設大小委員會，架空政務官，由高靜芝進行政治分配，黨同伐異，執行準政黨功能。大嶼山開發計劃，涉及重大商業利益，又係繞過公務員，成立一個梁粉委員會去做規劃，由林奮強、劉炳章去吹。
現時凶險之處係一個超低民望特首，卻集大權於一身，糾集一班利益集團，運用公共權力去進行大開發計劃，並用政治鬥爭方式作管治手段。香港人善忘，當日機管局內羅康瑞為求落實航天城商場大計，不惜琜爛臉公開火併主席張建東，因張認為第三條跑道優先，不應輕重不分，但為爭奪航天城商業利益，已去到唔顧身份之地步，可見大嶼山開發呢一大嚿肥豬肉，大家有幾咁心急。起公屋居屋係表面，CBD商業區、橋頭堡超級商場先至係利益所在。
新界東北開發大計、大嶼山發展大計，背後靠晒珠三角一小時生活圈，全部都係發達大計。梁營發展商「未富」，你班香港人「先驕」，要收入境稅減少內地客來港？儍的嗎？
添馬男