公民黨湯家驊（Ronny）早排趁農曆新年假期，去咗印度洋小島國塞舌爾旅行，其間仲因聽聞海中水壓同人體不同，潛水時可以有助排水減肥，就膽粗粗去潛水。點知第二日即發現俾人老點，事關佢發覺潛完水後即時重咗0.4公斤，「因為潛完水後肚餓，仲食得多咗嘢」，去完旅行一共肥咗五磅返港。
Ronny又透露，過去三個月「好邪」，除咗近三個月先後跌咗部iPad mini、iPhone同埋潛水相機，上次去旅行時，不但整斷咗支高爾夫球棍，又因違例泊車俾外國收數公司追數，相信要賠錢了事，八方祝Ronny未來一年，可以盡早結束「黑仔王」生涯。