隔牆有耳:太歲「顯靈」 曾浩輝嚇一跳 - 李八方

隔牆有耳:
太歲「顯靈」 曾浩輝嚇一跳 - 李八方

各大院校呢輪紛紛搞春茗,噚日八方就喺港大醫學院嘅春茗酒會見到久未露面嘅衞生防護中心前總監「曾仔」曾浩輝。滿臉春風嘅佢透露,辭任總監一職之後間中會返港大客串教書,亦有參與音樂會表演。生肖屬馬嘅佢剛過去嘅新年,就忙住去黃大仙攝太歲,仲講笑話用完電子攝太歲後,見到神像頭上噴煙,誤以為係太歲顯靈,當堂嚇咗一跳。
醫學院噚日亦安排咗護士學生舞獅,由院長梁卓偉同港大校務委員會主席梁智鴻點睛。梁卓偉透露,醫學院計劃安排學生上港大深圳醫院學吓睇中文排版,第一批上去嘅會係藥劑學生;佢話醫學院一直都有科「Medical Chinese」,將醫學英文術語繙譯為中文用語,但以往只係紙上談兵,上深圳醫院就可以實際應用。