兩個半月前，魏力寫了篇「發掘下隻阿信屋」，介紹嘉利國際（1050），當日曾飛升一倍，埋單都有七成。聽日就係情人節，寫多次，應吓節。
嘉利拓展中港婚慶業務，天時、地利、人和齊晒，無得輸。2014年諧音「愛你一世」，雙春兼閏月，仲要元宵、情人節相遇，19年先一次，搞結婚注定旺爆。想訂個情人節晚餐，打去嘉利婚慶主題餐廳「浪漫滿屋」，對唔住，一早full晒。喺呢個男士全天候被「鋸」的日子，套餐連加一988蚊，送埋溫馨浪漫的裝修，良好的食物質素（魏力真係去試過），性價比一流！
最新婚博會估計，今年本港逾6.4萬對新人註冊，較去年多6%；調查發現，搞結婚每對新人平均花30萬，齋計香港呢個餅仔都200億銀。大陸每年起碼成千萬對新人，當每對使5萬銀，已是千億產業。嘉利於東莞開設龍鳳山莊影視度假村，為全國唯一婚慶主題國家4A級旅遊景區，每個攝影套餐近萬蚊人仔，豬籠入水！
嘉利主業復蘇，旗下五金塑膠及電子代工業務毛利攀升，經營現金流飛升247倍至8,350萬，純利1,700萬元；配合兩三年內賺錢的婚慶業務，前景實淨兼sexy。情人節前股價欲罷不能，連行兩棍，收0.57元，如阿信屋半年賺1,300萬，值19億元市值，嘉利目標20億元市值，剛好係1蚊。
魏力
http://www.facebook.com/2012jason