陳豪（阿Mo）同陳茵媺（Aimee）人前人後都表現恩愛，尤其喺舊年愛情結晶Aiden出世後，就更加受歡迎，噚日兩公婆齊齊現身銅鑼灣出席鞋履品牌Geox嘅春夏系列預展，撇低囝囝乘機拍拖之餘，又可以搵奶粉錢，真係恨死隔籬！據知佢哋原本單獨出騷價係10萬，今次嘅合體價升到50萬，認真唔講得笑。
噚日兩公婆手拖手現身，着住貼身裙嘅Aimee大騷超豐滿嘅身材，問係咪升咗cup？佢儍笑話：「係咪讚我？」阿Mo搶答：「今日佢好靚！作為媽咪算係咁，係一個好靚嘅媽咪。」之後仲話不嬲都好滿意老婆嘅身材：「媽咪好辛苦，難得着得咁靚見大家。」Aimee當然冧爆，又讚囝囝好乖兼易湊，但就未戒夜奶，而佢哋仲未決定BB嘅中文名。
囝囝利是豐收
提到夫妻合體酬勞狂升，阿Mo話：「唔好話奶粉錢，努力做嘢係需要嘅，大家請我哋開心，希望值得，雙贏。」Aimee仲話囝囝今年利是大豐收：「已經將佢啲利是放喺枕頭底。」佢講笑話利是可以做多個枕頭。聽日情人節，佢哋話決定二人世界，放一日假咁話。
撰文：馮仁昭