香港多唔多有錢人？VISA應該最清楚，因為好多人使錢都經VISA卡。VISA香港及澳門區總經理陶偉邦透露，截至去年9月，全港VISA尊貴信用卡嘅用戶，按年升咗9%，有關交易額都升14%。尊貴卡除咗白金卡，有年薪超過40萬至可申請嘅Signature卡，仲有俗稱黑卡、只有獲銀行邀請至可以申請嘅Infinite卡，可想而知本地有錢人越來越多。Infinite卡優惠原來包括喺入境關口特快過關、折扣價訂私人飛機機位。至於白金、Signature卡，除咗購物飲食優惠，仲有好多大家平時少留意嘅，例如秘書服務，打電話或電郵佢哋，就可以幫你代訂酒店等。秘書遍佈全球，連落後村落、民宿主人唔識英文，佢哋都可以代訂㗎。